Ra’iisal wasaaraha xukuumada Soomaaliya ayaa soo dhaweeyay guulaha Ciidanka DFKG ah iyo AMISOM

Waxaa uu sheegay Ra’iisal wasaare C/wali Max’ed Cali Gaas in qorshaha socda uu bilow u yahay howlgalo la doonayo in dalka oo idil looga sifeeyo Al-shabaab, ka hor inta aan la gaarin bisha Ogoosto oo ah waqtiga ay ku egtahay dowladda hadda jirta.

‘’Qorshaha waa mid balaaran, qabsashada degmada Afgooye waxaa oran karaa waa mid bilow u ah istiraatijiyad la doonayo in dalka oo dhan looga saaro Al-shabaab ka hor inta aan la gaarin bisha Ogoosto ayuu yiri,’’ Ra’iisal wasaare Gaas.

Waxaa kaloo uu sheegay in mar uu soo hadal qaaday sida laga yeelanayo nabad-galyada deegannada ay gacanta ku dhigto dowladda in markiiba maamul loo sameynayo deegannadaas si xaalada loo dajiyo.

‘’Deegaanada lagala wareego Al-shabaab maamul ayaan u sameyn doono markiiba, si amaanka loo xaqiijiyo ayuu yiri,’’ Ra’iisal wasaare C/wali.

Dowladda KMG iyo AMISOM ayaa guul weyn u arkay qabsashada degmada Afgooye oo 30km oo kaliya u jirta magaalada caasimada ah ee Muqdisho, walow saraakiisha dowladdu leeyihiin qorshaha socda waa mid ka fog degmada Afgooye.