Shirkii lawada sugayay ee Ergooyinka Beelaha Soomaaliyeed oo Muqdisho ka furmay hada

Waxaa goor dhow ka furmay magaalada Muqdisho, shirkii ay kaasoo qeyb galayaan odayaal dhaqameedyada beelaha Soomaaliyeed, si ay u soo xulaan ergooyinkii ansixin lahaa qabyo qoraalka ay soo bandhigayaan gudiga madaxbanaan ee loo xilsaarey soo diyaarinta Dastuurka ku meelgaarka ah.

Furida madashaan ayaa waxa kasoo qayb galay Madaxda dowladda, Safiirada dalalka Caalamka u fadhiya Soomaaliya iyo Diblomaasiyiin.

Shirka oo furitaankiisa waqti hore la filayay, ayaa waxa cududaar ka bixiyay, Wasiirka Warfaafinta Soomaaliya C/qaadir Jahweyn asagoo ka raali geliyay in shirka uu arrimo farsamo dib uga dhacay, hase ahaatee qaban qaabada shirka ay aheyd mid aad u heer sareysay oo Gudiyada loo saaray ay isku soo duba rideen sidii shirka si wanaagsan u furmi lahaa.

Madaxweynaha Soomaaliya Shariif Sheekh Axmed iyo Gudoomiyaha Baarlamaanka Shariif Xasan ayaan ka soo qeyb gelin shirka, inkastoo xill galabnimo oo saacada Muqdisho tahay 3-da Galabnimo uu shirka si rasmi u furmay.

Shirka ayaa ka hor inta uusan furmin waxaa Kooxaha Hobolada Muusika ay ka qeyb galayaasha ku madadaalinayeen heeso iyo suugaan, iyadoo Kooxda Baambeyda Muusikada ay garaacayaan astaanta qaranka.

Ammaanka ayaa ah mid si aad ah loo adkeeyay, ciidamo isugu jira Boolis Nabad Sugida ayna wehliyaan AMISOM ayaa ammaanka si xoogan u sugaya, waxaana dadka lagu baarayay ilaa 10-goobood.

Shirkan ayaa maanta kaliya ku siman furitaan, iyadoo wixii maalinta berri ka dambeeya la guda geli doono sidii looga doodi lahaa soo xulida ergooyinka 825 xubnood ee shirweynaha Dastuurka ansixinaya iyo soo xulida Baarlamaanka cusub.